الصرّة مقطوعة فيها

ماهياش خوانجية ، ما عمرها ما كانت ليبرالية و لا بش تلبس ثوب الشيوعية ، تونسية بالمقدود و لا شرقية و لا غربية ، حمرا دم و قسات على اللي تردم بالهم ، دفعت بالعيد و عملت بيه للجمهورية عيد ، دفعت الدغباجي و الجربوع و نكرت في اللي يهواو الركوع ، حضنتنا ايام كاس تاي بميتين و يا كواش العشا خبزتين ، ما نكرتناش وقت الزين و زمانو الحزين و ما كرهتناش ايام الغنوشي و يا بانكة صبوشي ، مسكينة ساعات رهينة في تركينة و ساعات تاقف لروحها و تنادي على صلاحها ، يا سيدي بلحسن يا فارق الحزن ، يا سيدي محرز و يا للا المنوبية راهم الوزاكة لعبو بيا ، يا سيدي بوسعيد راو في الجلاز رقدت الصناديد ، تعيّط بالصوت العالي راني بلاد من غير امّالي ، يا جبل برقو راهم رجالتي للطليان حرقو ، يا سيدي الشبعان راو في كرشي الزوالي جيعان ، يا بحر الساحل راو قلبي المسكين واحل ...

هزوها للرومان مطمورة و الفرانسيس فيها ينهشو بالغورة و الاماريكان زرعو فيها نقاب و لحية الاحزان ، مسكينة لا صابت تستر على اللي في الجوف و لا على كنينها اللي تكتب في الزمم حروف ، صنديدة بقلب صناديد و طاحت في ذرية فاسدة ، واحد يبيع في عرق الزوالي و قال نا ملك البرّ الخالي و لاخر ينادي أنا صوت البلدية و انا نمنعها كان هي و لاخر و را اللحية متخبي و قال هذي ناقصة صلاح و انا كليم ربّي و ناس ملاح ...

مسكينة ، دمها في مرجي السرس يسقّي ، و في جبال قفصة للفسفاط يلقّي و في زناقي العاصمة يسكر و يبات في الساتيام يسمع في خايب الكلام ، امك ... بوك و علاش جابوك يا كلب يا ولد الكلب ...

مسكينة ، رجالها خانتها و نساها هانتها ، مسكينة حمرا و في قليبها جمرا من زمان بوعنبة و ما نجّم فيها السواد يتخبّى ، هي الميمّة و الحبيبة و الاهل و خديجة حبيبتي بالتربيجة ، هي الضحكة المسروقة و انبوبة البلدية اللي تنسات في حومتنا محروقة ، هي رئيس البلدية و رئيس الجمهورية و رئيس الضحكة المنسيّة و حي راهو بالسيف حي ....

#الحبيبة_الميمّة
#عاشت_ولاباس